Jest jeszcze czas śpiywania kolynd, ale je z tym coroz gorzij, bo melodyjo to pamiyntomy, ale słowa sie kajś potraciły, bo małokiej śpiywomy. Łostatnio byłach proszono na wilijne spotkani. Jedyn kamrat zagroł nom na akordionie kolynda, co jom niby wszyjscy znajom. Ozwało sie pora głosow, ale zaśpiywali my yno dwie zwrotki. Ze drugom kolyndom tyż było tak samo, no to chop zmarkotnioł. Zagroł jeszcze pora ślonskich, uciesznych pieśniczek a szoł do dom.
We kożdo Wilijo przed połedniym puszczom se moji stare płyty ze kolyndami, ale wiyncyj słuchom, niż śpiywom, bo po prowdzie ni mom z kim. Dziecka mom już wielkie, a miyszkajom łosobno, a moja stareczka Elza, co my dycki se społu śpiywały, je już prawie szterdziyści lot pod ziymiom. Ciynżko na sercu mi sie robi, jak se pomyśla, że tak je skoro w każdej chałpie. Łojce czasu ni majom, bo rychtujom wieczerzo, a dziecka siedzom przed telewizorym, bo je tela fajnych filmow. Aż dziw, że sie zyńdom do kupy przi wieczerzy, a potym na podarunki dziecka dostanom taki piykne graczki, że ło śpiywaniu kolyndow niy pomyślom.
Za moich młodych lot po wieczerzy to już łobowionzkowo trza było ta godzinka pośpiywać. Nojprzod kolyndy, a potym kantyczki ze starej ksionżki, co miała bez sto piyndziesiont lot. Isto jom jeszcze nikerzi w doma majom, chocioż już tych pieśniczek śpiywać niy poradzom.
Jeszcze pora lot, a ludzie przestanom tyż śpiywać we kościele. Łońskigo roku nawiydziłach bez Godni Świynta kamratka, co miyszko konsek łod Żorow. Majom tam piykny, nowy kościołek, drogi łorgany a młodego łorganisty, co piyknie śpiywo a jeszcze lepij gro, ale jedna rzecz mi się tam niy podobała – niy szło se tam pośpiywać, bo synek groł same jakiś nowe pieśniczki, a jak zagroł jakoś staro, to jom ciongnoł jak na dudach, a ludzie śpiywali po starymu, bezto farorz aż trzi razy musioł ich upominać, coby sie tak niy śpiychali a trzimali sie muzyki.
Tak se myśla, że tych kolyndow by mieli tyż we szkole uczyć na lekcyjach muzyki, bo przeca momy taki piykne polski śpiywki, ludowe pastorałki a kantyczki. Momy tego tela, że sie gańbować przed Europom niy muszymy!
Komentarze