Pozor, jagody mogom powalić!

Jo czynsto za bajtla jeździła ku ciotkom. Tak my godali na modsze siostry łod naszej starki, co łostały na łojcowiźnie. Niy było to daleko, ale bez feryje to była dycki jakoś łodmiana! Pomogałach im troszka na gospodarce, kedyindzi żech szła ze kerom ciotkom abo jejich somsiadkom na jagody do lasa. Jedyn roz jo była na tych jagodach yno ze paniczkom Tilkom. Łona mie zawlykła łogromnie daleko w las i jo sie boła, że niy trefiymy do dom, bezto żech ani wiela niy zbiyrała, yno rozglondałach sie po krzokach, coby droga nazod spamiyntać! Łoroz my wyszły na tako podmokło niwa, co na ni było pełno czornych jagod na takich krzokach, co były wielgi jak krze świyntojonkow u nos na zegrodce! Na samym pojstrzodku tej niwy rosły dwie dość spore kympki bagynci, tyj na mole!

– Widza dziołcha, ze mosz prożny zbonek, bezto bier sie do roboty a nazbiyrej tych jagodow, coby ciotka Tekla mogła chocioż kompotu nawarzić! – rozkozała somsiadka.
– Za kwila bydom dzwonić na połednie a trza sie bydzie brać do dom, krowy dojić...
Ciepła żech sie ku krzokom i roz-dwa miałach połny zbonek. Chciałach se jeszcze nazbiyrać do „dziurawego gorczka”, ale paniczka Tilka śpiychała sie do chałpy. Wziyny my yno po pora prontkow tyj bagynci a brały my sie ku wsi.
Przed fortkom my sie rozłonczyły, a kożdo szła do dom. Ciotka miała już kompot nawarzony, bezto kozała łostawić jagody na drugi dziyń a.skować do szpajzyszpranku.
Na drugi dziyń kole połednia przileciała ku nom Tilka:
– Babeczki roztomiłe, niy jydzcie tych jagodow, niy jydzcie! – wołała łod fortki. – Łone muszom być zatrute, bo mojigo starego powaliły! Wzion se ich połno asjetka po łobiedzie
a potym poszoł spać, bo sie poczuł jak po gorzole, ale nic mi wczora tyn gizd ło tym niy spomnioł, za to dzisio z rano trocha stynkoł na gowa, ale przed kwilom sie prziznoł, że sie czuje jako po przepiciu!
– Dziołcha mazej po jagody do szpajzki! – rozkozała ciotka. – Musza sie podziwać na to, coście nazbiyrały!
Jak żech prziniosła zbonek, wziyna jedna jagoda a roztarła we palcach:
– Tak żech se myślała: Łochyje! Byłyście we Gacioku, pra?! Pamiyntejcie se, tego co je za piykne, tego niy zbiyromy!

5

Komentarze

  • Stanik z Rybnika Do Grymlinej 10 lipca 2014 20:27Grymlino piyknie to kludzisz ,nima mocka łonakich Grymlinow .Grymlino jo winszuja ci mocka fajnych dzionkow , a dali fajnie łosprowiej co dziecka to pokł opiom
  • Grymlino Odpowiydź Stanikowi 09 lipca 2014 21:49Staniku, u nos godajom mosz "ślypia jak borowki" ale pytajom sie tyż " kaj idziesz na jagody", możnej, że to z polskigo do naszyj godki prziszło, ale na isto to tego niy wiym, a na czerwione borowki godomy bruski, ale stym to tak je, że praje w kożdej wsi godajom zdziebełko inakszy, ale my Ślonzoki i tak sie rozumiymy.Pozdrowiom Wos serdecznie
  • Grymlino Pisownia - odpowiedź 09 lipca 2014 21:39Uwaga niewątpliwie jest cenna, ale jak na razie twórcy śląskiej gramatyki nie dogadali się jak należy pisać, bo pomysłów jest kilka i każdy zachwala swój. Kiedy zostanie jeden konkretny, na pewno zastosuję się do reguł. Z uzyskanych przeze mnie informacji wynika, że wszelkie znaki diakrytyczne wywołują u moich znajomych "gęsią skórkę", większość z nich stwierdza, że jak zobaczy taki tekst, to go na pewno czytać nie będzie, niestety! Pozdrawiam autora komentarza i dziękuję za uwagę.
  • Stanik z Rybnika Na jagody 09 lipca 2014 18:50Fajjnie łosprowiosz jino we Rybniku momy BOROWKI (czorne)i BRUSINY (czerwone ) a niy jagody.
  • pisownia fajny tekst 09 lipca 2014 15:48tylko w zapisie brak "o" pochylonego, bo żaden Ślązak nie powie po polsku pozor tylko po śląsku: pozór albo pozŏr.

Dodaj komentarz