Po naszymu

Czynsto wszystek uchodziło łeboniom na sucho, bo starka zaroz łojcom spomniała, że łoni tyż za bajtla aniołki niy byli, abo przypomniała wiela nazgłobiali!
Jo dycki zazdrościła tym kamratkom, co miały aże dwóch starzikow, bo jo miała yny jednego. Paweł mu było na miano, ale ło nim żech już wiela Wom napisała, bezto teroz łopisza Wom tego, coch go yny ze fotografiji znała, bo umrził dziesiyńć lot przed moim narodzynim.
Mianowoł sie Jan (Johan) a narodził sie we 1896 roku. Jak mioł dziesiyńć lot umrziła mu mamulka. Łojciec łożynił sie po drugi, a te wiynksze dziecka to przociele rozebrali, bo już mogli robić jak stary, a zjedli tela co ptoszek. Starzik we chlywie nad świniami społ na snopku słomy, pod studniom we zimnej wodzie sie mył, na progu jeść dostowoł, a do szkoły mało chodził, ale jego tatulka to mało łobchodziło. Jak roz starzik spod z jakigoś chynboła we stodole, to bez dwa miesionce ruszyć sie niy poradził, bo krziż strzaskoł! Byłby we tym chlywie isto umrził, ale jedyn dalszy przociel łod jego mamulki, co koniom we dworze nogi nastawioł, ulitowoł sie nad synkiym a som go lyczył. Isto mu to dobrze poszło, bo go na nogi postawił, yno starzikowi łostała łopatka wybito, bezto mioł ciynżko znojść robota. Jak był troszka starszy, trefiła mu sie robota we żorski hucie i tam już łostoł. Za pomiyszkani, co znod u jednego chopa na Klyszczowce, odrobił na polu. Potym spotkoł moja starka Elza, co przijechała starszej siostrze przi dzieckach pomoc. Starczyno siostra miała chopa byamta, co się za robota na polu niy broł, bezto wszystek musiała zrobić moja starka. Za to, że poradziła koniym jeździć, fest sie starzikowi spodobała, ale zeżyli społu yno dwaścia lot. Starzik umarził jeszcze bez drugo wojna a starka łostała sama ze sztyryma dzieckami.
Wiycie roztomili, że tak czasym czowieka na spominki biere…!

Komentarze

Dodaj komentarz