Jak my kopali studnia

Bezto trza było wykopać studnia, ale stym ni ma tak łaps! Nikerzi se myślom, że styknie zrobić dziura i woda bydzie, no, możnej na jakich bażołach to by tak szło, ale podskorno woda ni ma zdatno do picio do ludzi ani do gowiedzi. Coby mieć dobro woda trza kopać fest głymboko, jednako najprzod trza znojś miejsce kaj ta studnia postawić. My mieli aże dwóch poszukiwaczy. Jedyn to był fachman-rożdżkorz, a drugi – mój starzik, co był fesztrym. Tyn fachman polotoł po polu ze rożdżkom, potym kozoł talulkowi we jedne miejsce wbić kolik i tam kopać, bo tam bydzie woda, chocioż fest głymboko. Na drugi dziyń mioł prziść starzik, bezto tatulek zaznaczył te miejsce yno kamiyniym, a kolik skowoł. Starzik prziniosł rozkraka ze lyski, po polu połaził i tyż na te same miejsce pokozoł. Tatulek jednako chciał wiedzieć, jak ta woda je głymboko, bezto starzik zamiast lyski wzion tako woga( wahadło) na lańcuszku a mie doł taki strzybne, łokrongle blaszki, co wyglondały jak pinionżki. Potym jedna rynka doł za plecy, a jo miała do ni te pinionżk kłaść , tak dłogo, aż starzik powiy, że styknie! Ze poczontku jo miała stego uciecha, ale potym jak żech przibliżyła ronczka ze tom blaszkom ku rynce łod starzyka, to mi sie łona zdała fest ciynżko, bezto żech sie wylynkała, a niy chciałach tak dalij se grać, ale na szczyńści to już było ku końcu. Starzikowi wyszło, że woda je na 19 metrze pod ziymiom. Łod tyj roboty cołki łosłob i chociaż roz siedzioł u nos w doma aż do wieczora, bo tak to mu sie dycki piliło.
Teroz łojcowie musieli poszukać jeszcze studniorza, coby ta studnia wykopoł. To był łogromnie niybezpieczny fach, bo sie zdorzało, że studniorza we studni przisuło. Stawiani naszyj studni szło dobrze aż do 18. metra, ale wody dalij niy było, bezto fachman podkopoł jeszcze trocha, ale ringow niy spuścił, bo sie śpiychoł do dom, bo coś tam sie nogle stało. W nocy prziszła kurzawka i studnia skrynciło, a woda my skludzili dziepiyro za pora lot – wodociongiym!

Komentarze

Dodaj komentarz