Dziyń handlowca

Dzisio to już ni ma tak jak downi, teroz robota we sklepie dostaniesz jak ci sie yno chce robić. Myśleć zawiela niy musisz, bo łod tego som mynedżery i tak dostowajom sie tam ludzie przipadkowi! Cera łod moji kamratki, co dzisio je kierowniczkom małego sklepu, tyż tak do handlu trefiła, ale łona dycki była robotno, a jak dała pozor, coby sie co dało poprawić, to se na kartce napisała a potym szła z tym ku swojimu szefowi. A łon jom jeszcze łobryczoł, że mu gupotami gowa zawraco, bo czy łon to zmiyni abo niy, to gupie kontmany i tak tym towor kupiom, bo je tani!A potym zaczon i szukać te nojgorsze roboty, coby sie i w końcu zmierzło. Dziołcha wiela niy godała, yno robiła, bo i na robocie zależało, ale kiej mynedżer kozoł i wciskać ludziom stary a zepsuty towor, to niy strzimała! Wziyna dwie nylonowe torbki, a naladowała tam tego „smrodu”. Jedna dobrze skowała a ze drugom poszła do oberszefa. Sekretarka i wpuścić niy chciała, to sie sama wcisła do szefowego gabinetu, jak tam keryś wyłaził. A to sie potym chop dziwowoł, co to we jego markecie sprzedowajom! Zaroz zrobił stym porzondek, ale łona do dzisio myśli, że to było tak troszka ze przimusu, że łon by woloł niy wiedzieć, co sie ludziom wcisko! Tyn dziyń już dziołcha niy szła nazod do roboty, a za dwa dni som szef doł i karteczka do szefa jednej myjszej firmy, bo padoł, że tako postawa trza nagrodzić! Jednako łona sie porzad zastanowio, czamu takimu „dobrymu handlowcowi” jako godoł, niy doł roboty we swoji firmie?!
Tam, kaj trefiła ni miała źle, ale sie jeszcze wiela musiała nauczyć.
– Wiycie – padała mi roz – jo sie dycki śmioła, jak żeście godali ło waszym tatulku, co sie uczył za kupczyka, wiela to musioł nauczyć sie ło towarze a jak sie chować do kontmanow, bo mie sie zdało, że styknie stanońć za ladom abo wele rygała i towor sprzedać, bo godało sie, że sie dycki znojdzie taki gupi, co tyn towor kupi! Jednako teroz towaru je zatela, i bezto trza go umieć ludziom zakwolić! A co jo powiym, jak nic ło nim niy wiym?

Komentarze

Dodaj komentarz