„Ło gupi rechtorce”
Kasia: Po co mie starziku mama statom do szkoły posyłajom, jak my momy strasznie gupio rechtorka!
Starzik: Coż tyż wom tam łona robi, że tak na nia godosz?
Kasia: Starziku, łosondźcie! Łona nic niy wiy, yno sie sztyjc pyto!
„Zgadywanka łod rechtora”
Rechtor: Teroz mom zagadka dlo nojmyjszych bajtli: Co to je? Furgo, furgo, skrzideł ni mo! Siado, siado, dupki ni mo!
Bercik wyskakuje a pado: Jo wiym, panoczku! Adam Małysz!
Rechtor: Ale ściebie gupielok, Bercik: To je piyrzi abo śniyg!
„Ło smarkaniu we szkole”
Dyrektor: chycił synka na szkolnej siyni: – Kazik niy smarkej do rynkowa a niy charkej mi sam na zol! Ni mosz synek sznuptychle?
Kazik: Mom, ale cudzym niy pożyczom!
„Pytanie na lekcyji religiji”
Katechetka: Kochane dziecko, powiydz mi, gdo to je, co wszystek wiy i wszystek widzi?
Dziołszka: Nasza somsiadka Klycino, paniczko Katachetko!
Katechetka: Czamu tak myślisz?
Dziołszka: Bo wczoraj nasz starzik godali, że łona wiy wszystek lepi łod samego Ponbóczka!
„Zgadywanka ze biologie”
Biologiczka: Dzisio bydzie cołko lekcyjo ło lesie! Powiydzcie mi, kery strom je nojstarszy we lesie? Niy wiycie? No przeca brzózka, bo je cołko bioło!
„Daleki przociel”
Rechtor: Antek! Mosz padać łojcu, że twój brat Pietrek wybił łokno we hajźlu! Za szyba trza zapłacić!
Antek: Łojcu powia, ale Pietrek to ni ma mój brat yny daleki przociel!
Rechtor: Cóż tyż to godosz, jo wos przeca znom!
Antek: Jo je nojstarszy a łon je siódmy we raji. Miyndzy nami je jeszcze piyńć dziecek, bezto łon może być yny mój daleki przociel.
„Piykne świadectwo”
Łojciec: (czyto świadectwo łod synka): Matymatyka – jedynka, polski – jedynka, prziroda – jedynka, śpiyw – patrzcie go, piontka! Ty giździe siaroński mosz taki kepski noty, a jeszcze śpiywać ci sie chce... ale jo cie naucza moresu!
Komyntorz: Tak to czasym trza, coby nauka w las niy poszła! Pamiyntejcie ło tym roztomiłe dziecka we nowym roku szkolnym!
Komentarze