Tego roku momy wielgi hyc

 

Po naszymu


 

Gdo to widzioł, we czyrwniu dziepiyro sie lato zaczło, a już my mieli taki hyc! Jo to rozumia, żeby to było we lipniu abo we siyrpniu, jak trza siyc ôbiyli, ale teroz toby se ta pogoda miała to wziōnś tak libeźnie, po lekutku: wiaterek troszka cieplyjszy, słoneczka tyż małowiela, tak ze 25 stopni by stykło! Czuli by my sie jak na zagranicznych wywczasach na tych wywołanych wyspach Seszelach, ale nejści bez lato to tam tyż je cieplij, tak żech roz we telewizorze słyszała!

A sam było tak fest gorko, że ludzie padali jak muchy, samach to widziała: chop szeł drōgōm, a ôroz go hercszlak chyciył, dobrze, że chocioż ta sanitarka ze dochtorym była na czas, bo już by było pō nim. Przi takim hycu to starzi ludzie ani na dwōr by sie niy mieli pokazować, yno w dōma siedzieć, nogi w misce ze zimnōm wodōm moczyć, na gōwa a na serce zimne a mokre umszlagi dować. Jednako ni ma tak dobrze, jako by my chcieli, bo kożdy jakiś ôbowiōnzki mo i na tyn hyc czasym wylyź musi. I tu zaś musza przipōmnieć staro prowda: trza se gowa przikryć czopkōm, chustkōm abo eleganckim hutym, jak go kery abo kero mo! Na ôczy słoneczne bryle wsadzić, a potym sie dziepiyro po słōneczku paradzić!

A jeszcze kryma tako ôd słōneczka ze filtrym kupić a rōwno sie niōm pōmazać, coby niy wyglōndać potym, jak mōj synek po wywczasach nad naszym, polskim morzym. Moja cera pojechała tam ze naszōm sōmsiadkōm, a synek, co już był po maturze, mioł jōm tam ôdebrać, a prziwiyź nazōd do dōm. Ôn ôstoł jednako dwa dni u tych naszych znajōmkōw i zaroz piyrszy dziyń szeł na plaża ze siostrziczkōm, a ôna go tam namazała takōm fest dobrōm krymōm ze wielgim filtrym, coby go niy spolyło.

Jak przijechałi ôba nazōd, to żech sie dowiedziała, że mōm pasiatego syna! Cołki brzuch a pleca mioł we biołe a czyrwiōne poski, cołkym jak ta cebra, yno ôna je czorno a bioło. Przi wodzie tyn chyc zdo sie dycki myjszy, bezto se myślymy, że sie niy spolymy, a że my sie ôszydziyli poczujymy dziepiyro we wieczōr. Jo tyż roz za modu żech se pleca spolyła, a potym fest ciyrpiałach i coluśko noc żech niy spała. Starka Kubersko, coch jōm wtynczos była nawiydzić, mi ich maślōnkōm ôkłodała do rana. Beztōż godōm: dejcie se roztōmili pozōr!

 

 

PS. Życza Wōm wszyjskim dobrej pogody, wywczasujcie sie, a do dōm szczynśliwie nazōd przijedźcie.

Komentarze

Dodaj komentarz