Stilonowqo tasza / Grymlino
Stilonowqo tasza / Grymlino

– Ôma, niy targejcie tela tyj folije, bo na drugi roz wōm tego niy weznymy, już i tak mocie tego za tela! – a potym sie ôśmioł. Ôdpedziałach mu wkurzōno:
– Dyć jo sam dała yno dwie puciynki ze syra, a reszta to ni ma moji! Ci ze miasta, co tam we tyj śmieciowyj radzie siedzōm, by mie musieli po gołyj d… całować, za to, że jo tyż za inkszych te giździarstwo pozbiyrōm!
– Niy gorszcie sie ôma na nos – padoł tyn drugi karlus. – A napiszcie pismo do Urzyndu Miasta, bo ôni tam nic niy wiedzōm…
Na tym sie nasza godka skōńczyła, bo te synczyska pojechali dali! A jo zaczłach myśleć co z tōm folijōm zrobić: potrzebno je i ciynżko mieli by my sie bez ni ôbyć, ale nikedy je ji rychtik zatela! Choćby dzisio, prziszłach ze naszego Hipermarketu a prziniōsłach dwie połne taszki towaru. Te folijowe taszki tam sōm jeszcze za darmo, nō to ludzie bierōm, a sprzedowaczki tyż ich tam niy żałujōm. Podziwałach sie do jednyj taszki zrobionej ze hrubszyj folije, bezmała ekologicznej, a tam zaś bōło połno tych folijowych miyszkōw. Nojprzōd uwidziałach kilo jabek aże we dwōch ôroz, bo tyn piyrszy miyszek bōł taki ciynki, że sie roztargoł. Kurzo wōntrōbka, tyż we dwōch bōła, bo fest ciapro. Potym miałach tam jarzina do szałotu, a kożdo zorta we ôsobnym miyszku, a jeszcze we takim wielgim, że jakby sie niy potargoł (bo za ciynki bōł), toby szło tam i kilo wsadzić. Roz żech dała wszyjski jarziny do jednego miyszka, ale paniczka na kasie godała, że ôna mo bezto wiyncy roboty, a po drugi żebych dała kożdo zorta ôsobno. A stykło by ta gemiza ze jednego miyszka wyciōngnōnć, zwożyć a do drugigo wsadzić, tak by my zepsuli yno dwa miyszki a niy sześ!
I tak mōmy na kożdym kroku, a hołda tyj folije rośnie, a niy kożdo do sie po drugi przerobić! Bezto lepi ji ze sklepu niy brać, jak niy trza. Jo se poszyła tasze ze starego stilōnowego fōrtucha. Do śmieci niy poszoł, a jeszcze jakiś czos za tasze posłuży! Co godocie?

8

Komentarze

  • Jana folijowe taszki 02 marca 2018 20:18moja somsiadka godo na te reklamowki : nelonbojtle.
  • Stanik z Rybnika Do Grymlinej 02 marca 2018 07:43GRYMLINO my we doma mianowali ta srogo tasza tragentasza abo ańkauftasza, Grymlino fajnie se Wos czyto szrajbujcie jino tak dali.
  • autochton ewolucja 01 marca 2018 21:46Grymlino, wszystko sie zmienio. My już też nie godomy jak nasze starziki. Nie do sie nazwać czegoś po starymu czego nasze starziki nie znali. Jak nazwiesz po naszymu telefon, komórka abo smartfona? Jo na plastikowo tasza godom reklamofka i już.
  • Grymlino. Do wszyjskich, co komyntowali ta godka ło folijowych taszach 01 marca 2018 13:56Dziynki za komentorze, anich sie niy spodzioła, że ich tela bydzie. Te wszyjski małe "reklamowki", co im po polsku godo sie "zrywki", bo ich trza urwać ze rolki, to isto zastompiły tytki ze papioru. Ale jak pomianować te wiynksze "reklamowki " ze hrubszyj folie, co poradzom udźwignońć 5 kilo i za nich sie płaci tym ekologiczny podatek? Pozdrowiom Wszyjskich
  • Jana folijowe taszki 28 lutego 2018 10:26Pani Grymlino my godali tasza, z taszom sie szło do sklepu. Taszka była do kościoła a na taki myjsze tasze godali tyż kajsterki abo bojtliki. Co do tych pierońskich platsikow mocie recht, wszyndzi sie to świństwo poniewiyro.
  • senior ?? 27 lutego 2018 16:30Pani Grymlino, nec -Netz z nimieckigo, to przeca siatka, sak. Te dzisiejsze reklamówki, to wedle mie zastąpiły downiejsze tytki, kiere były z papióru.
  • Grymlino. Do Seniora. 26 lutego 2018 18:42Dziynkuja serdecznie za komentorz, jak bydzie wiyncy takich ludzi, co sie łodezwiom, to isto te wszyjski rzeczy po ślonsku pomianujymy. No bo jako pomianować po naszymu "reklamówka". Łona ni ma tako wielgo jak tasza, ale wiyncy wlezie do ni niż do bojtla. Tyż żech nad tym myślała. Sakow abo necow, jako im nikerzi godajom, już sie niy nosi, a na te uszyte ze stelonu, to my dycki tasze abo stelonowe taszki godali. Jo sie już tyż moga miyndzy syniory porachować i malowiela jeszcze ze modych lot pamiyntom.
  • senior ?? 24 lutego 2018 19:30Z taszką, to się chodziło i chodzi do kościoła. Do sklepu chodzi sie z siatką abo z sakiem. Do miasta starka brała tasza na zakupy.Szyto z jaki dermy. Zdecydowanie większo od paradnej taszki i w ni zawsze jeszcze miała jaki sak, co by większe zakupy mieć kaj dać. To z nelunu cieńkiego, to może być bojtel a ni taszka.

Dodaj komentarz