Wiela mosz braterstwa / Grymlino
Wiela mosz braterstwa / Grymlino

Praje we kwiytniu ludzie wymyśleli Dzień Rodzeństwa a po naszymu – Dziyń Braterstwa.
– Wiela mosz braterstwa? Tak sie dycki we szkole dziecka dopytowali, bo tyn, co mioł braterstwa zatela, to strach było ś nim kamracić!

Jak sie co dzioło, to sie dycki braterstwo ôd tego istnego do kupy zebrało, a tymu drugimu, co sie stawioł, fest łocupało! Sy mnōm do klasy chodziły dwie pory bliźniokōw. Jedni to byli dwa syneczki a ta drugo porka – dziołcha a synek. Te syneczki to tak doś zgodliwie żyli. Co tyn myjszy zarzōndziył, to tyn wiynkszy wykonoł. Bo ze bliźniokami to je tak, że jedyn je ôd myślynio, a tym drugi je ōd roboty. Jakby to bōła jedna dusza we dwōch ciałach. Gorzi troszka było ze tym synkiym a dziołszkōm. Ci, to sie prali na zabito! Ale jak kerymu kamraty abo kamratki chcieli łocupać, to te dwa małe gizdy zbiyrali sie dycki do kupy, a potym „wrogi” do dom ze bekym lecieli! A na drugi dziyń ôjcowie ôd tych potrzaskanych do szkoły przichodziyli ze skargōm. Roz jedyn nasza pani zawołała tych bliźniokōw, co to taki rojbry bōli. Spytała sie ich, jako to je, że jak sōm sami to sie pierōm, a jak kery im zagrozi, to sie na niego społu ciepiōm. Ôni ôroz wrzaskli, że ni może tak być, żeby im kery brata (siostry) proł na jejich ôczach! Toż już teroz wszyjstek wiycie!
Jo mōm yny jednego bracika ô dwa lata modszego, ale za bajtla to my sie tyż czasym poprali, bo ôn gibko urosnōł i jak mu było ze dziesiyńć, to bōł mocniyjszy jako jo! To tak twało ze trzi–sztyry lata, bo potym, to ôn bōł mōj wielgi kamrat. Chodziōł sy mnom do kina, a nikedy tyż na szpacyr na miasto, ale za to szpacyrowani jo mu musiała pomōgać zadanie napisać. Jak już poszoł do stredni szkoły, to jedyn roz mioł do mie ekstra zadani. Za to co uszporowoł, kupił dwa bilety do kina, a fest mie pytoł, cobych ś nim poszła. We tym kinie bōli tyż jego trzi kamraty ze szkoły. Te synki bōli ze Rybnika i mie niy znali. Bezto uznali, że jo je bracikowo lipsta, a koniecznie chcieli mie poznać. Już żech im chciała pedzieć, jako je prowda, ale bracik mi mrugnōł i jo go niy wyzdradziła, chociaż mie jynzōr świyrzbioł! Sami widzicie, że czasym starszo siostra sie przido!

2

Komentarze

  • Grymlino. Panoczku Szlapiczkorz 13 kwietnia 2018 17:34Mocie prawie, tam je feler, a nic sie niy do teroz ze tym zrobić, bo malunku sie niy wymaże. Pozdrowiom
  • szlapiczkorz Pokaża? 12 kwietnia 2018 10:30Dej mu pokoj, bo jo ci pokoża -tak sie u mie godo.

Dodaj komentarz