Wypluj sie, coby ci sie niy zachciało

U nos we Żorach było pora piekarzi, co roztōmańte kołocze, kołoczki, babōwki, szumne dorty, cwibaki a kichle piykli. Jeszcze za czasōw, kej moja mama bōła bajtlym, jedna tako piekarnia miała wielgi szałfynster, co w nim tam połne miski tych maszketōw stoły. Nikere dziecka jak tam wele ni szli, to przechodziyli na drugo strōna drōgi, a ani sie na te dobroty niy podziwali. Jednako drugi łebōnie przichodziyli aż pod same ôkno. Kwila tam postoli, ślina poprzełykali, a jak ji mieli we gymbie zatela, to na chodnik przed sklepym sie wypluli. Modo piekorka ôgrōmnie sie gorszyła, a te frechowne dziecka porzad przegōniała, ale to wiela niy dało! Mamulka ôd jejigo chopa miała na tych bajtli lepszo metoda. Co drugi dziyń, jak im tam co ze tych słodkich maszketōw ôstało, to to dycki tym bajtlōm wyniōsła przed sklep, a godała im, coby sam przed sklepym niy pluli. I dziecka jōm posłuchły! Dycki czakaly we raji pod ôknym, aż starka im co wyniesie i niy wadziyło jim, że tego niy bōło wiela. Nikedy jednym koloczkym i trzech bajtli sie podzieliło, ale smaczysko mieli zbyte!

 

Jo tyż do dzisio ta piekarnia spōminōm, chociaż downo ji już niy ma! Jak żech bōła bajtlym, to jo tam dycki kożdy grosz, co żech dostała ôd starki, starzika abo ôjcōw wyniōsła! Bo tam mieli takie dobre makrōnowe rōżki, co jo im fest przoła. Za to, że jo bōła „stało klijyntka”, toch roz za czas dostała tyż cosik ekstra: czasym drugi ciastko, kedy indzi szlagzany do wafla abo na sprōbowani jako nowo zorta kichli, co ich praje upiykli! Do dzisio spōminōm tyn czas, co my chodziyli rano na roroty, potym prosto sie leciało do tyj piekarnie po świyżutki żymły, co aż trzeszczały we zymbach, a potym zaś nazod do szkoły na ôsmo godzina. Ôd tamtego czasu, wiyncy żech już takich dobrych żymłōw a kołoczkōw niy jadła. To bōły dobre czasy, a rada ich spōminōm! 

Ps.

Serdeczne podziynkowani za pōmōc we ślōnski korekcie do panoczka Alojza Zimōńczyka.

1

Komentarze

  • Chop ze Żorow tyn artykuł 17 grudnia 2018 12:01Moja starka tyż tak godała, a nojlepi było sie na te rzeczy do jodła niy dziwać!U nos jeszcze godali , że łod tego zasmaku idzie pypcia dostać, ale eli je to prowda? Pozdrowiom

Dodaj komentarz