Czego możesz sie nauczyć ôd swojigo wnuczka?

Jednako świat sie fest pozmiynioł. Jeszcze pora lot nazod my, starsi, ani wiela niy wiydzieli ô kōmputerach, kōmōrkach, smartfonach a tabletach, a teroz musieli my ku tymu gibko przibadać! Bo my hnet tyż prziszli na to, że nōm sie tyż przidajōm. Jak kery starzik abo starka sie fest ôganiali, to im na geburstak kupiyli ta kōmōrka, a potym wol – niy – wol musieli sie nauczyć, jako sie trza ś niom ôbsłōżić!
Jedyn mōj znajōmek, co mioł dōmowy telefōn, za nic niy chcioł tyj kōmōrki, bo godoł, że bydzie sie czuł bezto ôgrōmnie uwiōnzany.
– No, bo kery to widzioł, coby taki ciurstwo wszyndy ze sobōm brać!– godoł. – Tam sōm taki „szmery– bajery” (te słowo to se pożyczoł ôd wnuczka – szkolorza), co sōm dobre do bajtli, a niy do starego opy! Jo przeca grać na tym niy byda, a na tym internecie sie niy znōm!
Familijo wziyna norzykani starzika pod rozwaga, ale kōmōra mu i tak na te urodziny kupiyli! Wtynczos tym mōj znajōmek posłōchoł jednego kamrata, co mu radziył, że nojlepi zrobi, jak ta kōmōra kerymu skali, to zgorszynio niy bydzie! Jednako przedać gyszynk ôd dziecek, co mu go ze serca kupiyli, to mu bōło gupie! Bezto starzik wykōmbinowoł, że ôn do tyn aparat wnuczkowi, co już do szkoły chodziył. A jak sie kery bydzie pytoł, to powiy, że sie syneczkowi fest widzioł! Plan dobry bōł, ale nic ś niego niy wyszło, bo mody zaczōn sie śmioć, jak starzikōwo kōmōrka uwidzioł:
– Ale starziku, niy chca, chcecie coby sie sy mie dziecka we szkole śmioli? Taki wielgi nōmery, a litery, jo przeca ślepy ni ma, a bryli tyż niy mōm, ani do czytanio! To je yno taki zwykły aparat do starzikōw! Nowy je, ale gańby bych se narobiył, jak bych się kaj ś nim pokozoł, niy starziku, piyknie dziynkuja!
– Ty sroła, dej se pozōr s kim godosz! –wkurził sie starzik. – A poradziył byś mie nauczyć?– spytoł sie za kwilka.
Synek sie wykryncoł, na siōdmo strōna, ale w kōńcu na to przistoł, a starzika nauczył! Yno sie ôgrōmnie dziwōwoł, że starzik je taki „niykumaty”, bo musioł go uczyć cołki miesiōnc, niż sie piyrszy roz ôpowożył zazwōnić na prōba do starki.

Komentarze

Dodaj komentarz