Świecie, kaj lecisz?

Magda miyszko we chałupce po swojich ôjcach teroz już yno sama, bo ji ôd ni chop umrził. Godo, coby ni miała norzykać na ta samota, bo dwie ulice dali mo syna ze familijōm. Modzi przidōm dycki ku ni ze dwa, trzi razy we tydniu, a pytajōm sie, eli cosik niy potrzebuje? Do wielgigo marketu jōm autym weznōm roz na miesiōnc, a tam se nakupi te nojważniyjsze rzeczy. A cołko reszta mo we ôsiedlowym sklepiku, co stoji kōnsek ôd jeji chałupy. Na wiosna Magda dostała turnus we sanatorijōm. Zdrowi podreperować by sie zdało, ale w dōma miała staro koczka, co u ni bōła już bez dziesiynć lot, a Magda niy chciała ji samyj ôstawić! Mode padali zaroz, coby se niy robiyła starości, bo ôni sie koczkōm zaôpiekujōm. We Ustroniu Magda fest wypoczyna a nazbiyrała nowych znajōmkōw, ale bōło ji porzad tesno za wnuczkym, co mu bōło bez trzi lata, a za tōm starōm koczkōm! Bezto fest sie radowała, że jedzie już do dōm. Jak rano przijechała, to wnuczek bōł we szkōłce, ale rachowała na to, że chocioż koczka sie uraduje na jeji widok, a tu sie ôkozało, że koczki już niy ma! Mode padali, że koczka sie fest rozniymōgła i trza jōm bōło dać „uśpić”! Jednako Magdzie nic niy padali, coby ji wywczasōw we sanatorijōm niy zepsuć. Bezto ôna se trocha po cichu pobeczała, ale już nic niy poradziyła zrobić! Po połedniu prziszoł ku ni wnuczek i piyknie se ôba grali, ale ôroz Magdzie przed ôczami stanyła ta staro koczka, a dziołcha sie rozpłakała. Mały zaroz sie starki spytoł, czamu ślimto, a jak mu padała co a jak, to ji padoł tak:
– Wiesz babciu, ten kotek był stary, brzydki i śmierdział. Dlatego go mama z tatusiem uśpili! Teraz możesz sobie kupić nowego! Najlepiej jakiegoś rasowca!
– Wiysz syneczku, jo tyj koczce dycki przoła! Bezto mie teroz serce fest boli. Ôna bōła cołkiym jako jo: staro, szpetno i żodnymu niypotrzebno! – ôdpedziała starka.
– A, rozumiem! – małymu zaświyciyły sie ôczka. –Ty, babciu teraz boisz się, że oni cię też uśpią!
Roztōmili ludeczkowie, dejcie pozor na to, co przed dzieckami godocie!
A jak Wōm już co ze gymby wyskoczy, to sie dycki bajtla spytejcie, jako ôn to rozumi? Bo jak tak dali pōdzie, to sie doczkōmy takich czasōw, co niy yno chorych a starych zwiyrzōw modzi bydōm „usypiali” ze litości!
A jeszcze bydōm sie kwolyli że sōm fest humanitarni!

Komentarze

Dodaj komentarz