Sōnki, szlincuchy abo narty

Jo żech dycki narty mieć chciała, ale żech ku nim za bajtla niy prziszła. Bo mojim ôjcōm na nic takigo wymyślatego niy stykało. Jedinie co my ze bracikym dostali kejś ôd potka szlincuchy, taki na „keliszki”. Nikerzi isto wiedzōm, co to je! Stow do klyjzanio my mieli po blisku, ale wiela my sie tam na tych szlincuchach niy najyździyli, bo nos ku tymu bōło aże dwōch! Za to na sōnki to my praje kożdy dziyń lotali bez zimowe feryje. Za tym stawym, kaj my klyjzali, były taki dwie wielgachne kympy. Czasym tyn chop, co tam mioł posiōne ôbiyli, nos pogoniył, ale my byli modzi a gibcy, to nos chycić niy poradziył! Dycki jedni wachowali, eli ôn niy idzie, a drudzy sjyżdżali ze wiyrchu aż ku stawie. Roz za czos przichodziył tam tyż taki panoczek kole sztyrdziestki, co jeździył na nartach, ale ciynżko mu to szło, a jak sie ôbalył, to przezywoł na nos, że my mu cosik na bzdury zrobiyli!
Zimowe szporty to je fajno graczka, ale czasym sie tyż płaczkami skōńczyć może, jak se czowiek niy do pozōr! Moja kamratka Neżka dała sie roz namōwić swojim wnukōm na sōnki. Te dwa synczyska udowali, że ś niōm na te wielgi sōnki siodajōm, ale potym zeskoczyli, a starka ze kympki spuściyli! Na dole sōnki podskoczyły na jakimsi kamiyniu, co bōł pod śniygym, bezto starka spadła, a rynczysko se połōmała! I tak gupio graczka skończyła sie gipsym na sześ tydni. Mōj chopeczek tyż kejś pojechoł z dzieckami na narty do Skoczowa, a tam se kolano uszkodziył, ale twardo jeszcze dziecka do dōm dowiōz! Dostoł potym, gips na pora tydni, chocioż dycki bōł wiyncy wyszportowany jako jo! Kupa lot nazōd jo tyż dałach se przegodać ōd naszych dziecek , cobych siadła na sōnki a sjechała ze gōrki, chocioż bōło mi już bez szterdzieści lot. Zdało mi sie wtynczos, że se ze tym poradza, ale śniōsło mie do taki lodowej rynny, a tak mie wytrzynsło a kupa strachu nagnało, że ōd tego czasu na sōnki już niy siodōm!

Ps. Fajnego zimowego ôdpoczynku Wszyjskim Wōm życza, ale na gupoty Wōs niy namōwiōm!

Komentarze

Dodaj komentarz