Jak uwarzić dobry żur ze banie

Porzad cosik wydziwiali, a to, że tyn żur je jakiś płōny, a to, że niydowarzōny, a to że lepszy bōłby kōmpot ze tyj banie! Starka miała we kuchyni rōmka ze roztōmajtymi gywyrcami, co do zupōw dowała, ale nōm, bajtlōm, tam ani pojrzeć niy dała! Roz jedyn, jak starka poszła na wiysiady do znajōmkōw, my ze bracikym dali sie do ôglōndanio tych piyknych puciynkōw, co tam stoły. Bracik wloz na stołek, sjōn jedna puciynka a doł jōm mie. Potym jak sloz na ziym, to my jōm otworzili, a tam były yno trzi taki doś wielgi kulki, co wyglōndały jak kozi bobki, ale jako sie to mianuje to my niy wiydzieli. Ugryź ich niy szło, ale piyknie wōniały. Zaroz my se zaczli nimi po stole kulać i jedna kulka nōm sie kajś straciyła! Jak sie zaczło robić na dworze cima, to my te dwie, co ōstały, wpakowali do puciynki nazōd, a na rōmka postawiyli, coby starka sie niy kapła, że to my ji tam poszkłōdziyli. Ale ôna dostała wtynczos ôd tych znajomkōw wielgo bania, a na drugi dziyń uwarziła nōm ś ni zupy na ôbiod i cołko sprawa sie wyzdradziyła, bo dycki sie troszka tego muszkatu do nij dowało! Moja mamulka niy miała tyj zupy ze banie rada. A jak ji cosik niy smakowało, to dycki godała, że to je jako żur ze banie! Dziepiyro do takigo jodła przekōnała mie moja kamratka ze roboty. Ôna rada ta zupa warziła, a godała, że trza jōm yno dobrze doprawić, a miała prawie! Jo tyż kożde lato żur ze banie pora razy uwarza i wszyjskim smakuje.
Jednego roku jo se ôstawiyła dwie małe banie na zima. Polożyłach ich na regał do taki pywnice, kaj mało chodza, a spōmniało mi sie ô nich dziepiyro we lutym i padałach mojimu chopu, coby jedna przinios. Za kwila ôn przilecioł ze larmym, że ze jednej ôstoł yno kōnsek, a drugo tyż je ôbżarto. Banie my wyciepli, ale niy poradzili my spokopić, co sie ś nimi stało. Sprawcami ôkozały sie te wielgi ślimoki! Ale nojwiynksze ślimoki, to byli my dwa stare, bo my sie pryndzy niy kapli, że u nos sie te gizdy zalōngły. Isto sie dobrze przed nami dycki skryły!

PS. Dziynkuja panoczkowi Alojzowi Zimōńczykowi za pōmōc we ślōnski korekcie.

Komentarze

Dodaj komentarz