Ucz sie, syniorze!

To samo godajōm nasze starki! A teroz jo Wōm zdradza jedna tajymnica: czowiek sie uczy bez cołki żywot, niy yno we szkole za modu, ale tyż ôd drugich ludzi. Yno trza ś nimi pogodać! Mōm takiygo znajomka, co mu idzie na 92 rok i jak my sie wczora potkali , to padoł mi tak:
– Na staroś, dziołcho, to rynce a nogi potrzebujōm mieć troszka pokōj, bo rojma czowieka chyto i łazić za bardzo niy idzie. Jednako ta nasza kapusta, co jōm mōmy na karku, ta to musi robić jak za modu, abo i jeszcze wiyncy! Jo se kożde rano gazeta poczytōm, a nie wadzi mi to, że ni ma cołkiym świyżo, bo ważniyjsze je cobych czytać niy zapōmnioł. Krziżōwki ze babskich gazet, co ich moja cera kupuje, tyż roz za czos porozwiōnzuja! Potym ida se po żymły na wieczerzo, coby sie troszka rozruszać! Przed połedniym posiedza se kwilka ze naszym psiokym na placu, zaś po ôbiedzie se lygna na pōł godziny, a ku wieczoru telewizōr se rod poôglōndōm, abo ze prawnuczkym siedna przi kōmputerze. Wiela tymu niy rozumia, ale żech już troszka pochytoł, a nikedy cosik tyż poradza zrobić! Na wieczerzo jym mało, a ô dziesiōntyj porzykōm a ida spać. I tak mi fajnie czos minie, bo we kożdy dziyń sie czego nowego naucza, abo sie dowiym czegoch niy wiedzioł, choć już tela czasu żyja!
Bez dziesiyńć lot nazod jo sie tyż sama musiała nauczyć na komputerze. Teroz je we tym internecie tela nowości, że jo tyż sie sztyjc chytōm na tym, że czegosik niy wiym! Pora dni nazod poszłach do pasmanteryje, coby kupić gumin do galotkōw. Jo bōła ôstatni kōntman przed zawarciym i dali my sie na kwilka s tym panoczkym, co tam przedowoł, do godki. Że praje wszyjstek mogymy se popłacić bez internet to, żech wiedziała, bo roz za czos sama to robia! Ale jako zapłacić za parking we Żorach kaj stoi moji auto, jak jo je we Warszawie a byda nazod dziepiyro za dwa dni? A biletu żech niy poradziła wziōnć, bo wczas rano przed mojim ôdjazdym parkomaty jeszcze niy bōły czynne! Jako widzicie, roztōmili, ze ludziami trza godać, bo zaś żech sie czegosik nowego nauczyła, chocioch we szkole niy bōła!

Ps. Dziynkuja panoczkowi Alojzowi Zimōńczykowi za pōmōc we ślōnski korekcie.

Komentarze

Dodaj komentarz