Roztmiło nasza familijo
Roztmiło nasza familijo

Nikerzi majōm jeszcze starzika a starka co ś nimi miyszkajōm. Takim to sie godo „familijo wielokopolyniowo”. We starych chałpach, to sōm dycki wiynksze familije, a we nowych familokach to yno ôjcowie a dziecka, a ku starce a starzikowi jedzie sie dycki na feryje abo na świynta. Godajōm, że tatulek to je gowa tyj małyj familiji, bo ôn na nia robi, chociaż we naszych czasach mamulka mu tyż pōmōgo, bo do roboty chodzi, a dziecka idōm do szkōłki a potym do szkoły. Bez dziyń sie mało wszyjscy widzōm, dziepiyro we wieczōr sōm wszyjscy społu. Jednako we wieczōr to sie już ôjcōm a dzieckōm ani wiela niy chce robić, bo sōm fest umordowani, a tu trza przirychtować wieczerzo, bajtli pōmyć a pogōnić ich spać. Troszka lepij je, jak tako modo familijo mō jeszcze starki a starzika, co nojmyńsze dziecka powachujōm, ôbiod modym nawarzōm, czasym prani wypierōm, bo teroz ta procno robota pralka zrobi, yno dycki trza na nia dać pozōr! Czasym starzik tym myjszym dzieckōm ksiōnżeczki poczyto abo jaki bojki pobojo, a starszym we szkolnym zadaniu pōmōże. Za to ze tatulkiym idzie se pograć we bala, a ze mamulkōm iś we sobota na basyn. Przedstawiłach sam ôgrōmnie piykny ôbrozek, ale we dzisiyjszych czasach małokere dziecka tak majōm! Dłōgo we szkole a szkōłce siedzōm, a potym ôjcowie gnajōm ś ni mi do dōm. Bo tam zaś je dycki jakoś dōmowo robota, co jōm tyż trza zrobić jeszcze dzisio. Ni ma ani kej ze dzieckami pogodać, chcioż ône na to czakajōm bez cołki dziyń! Rade by ôjcōm padały, jako bōło dzisio we szkole, jaki noty dostały, na kerego pani nawrzeszczała i za co to bōło, na kere kōłko niy chcōm już chodzić, bo sie im niy widzi, abo ô co sie ze siostrziczkōm abo ze bracikiym pojargali – yno, że żodyn ich niy wysłōcho!
Bezto tym wszyjstkim naszym familijōm życza, coby se aby roz we tydniu społu przi stole siedli. Dejma na to we niydziela, dobry ôbiod zjedli, a potym se tak serdecznie pogodali, bo tego trza wszyjskim: tym wielgim i tym małym! Coby kożdy mōg potym padać: My sōm ta prawo familijo!

Komentarze

Dodaj komentarz