Iś we niydziela do roboty

S nimi je tak, jako we tym wicu, co go wszyjscy isto znajōm:

Prziszoł farorz na kolynda a pyto sie małego Pietrusia: Chodzisz ty syneczku we niydziela do kościoła? Ja! – pado Pietruś. A do kerego ? – pyto sie farorz. A do Carfoura! – kwoli sie syneczek.

Jedni sie radujōm, że chocioż bez dwie niydziele we miesiōncu do roboty deptać niy muszōm, a drudzy lamyntujōm, że bezto mało zarobiōm, bo za niydziela płaciyli dycki pora groszy wiyncy! Tak to już je – wszyjskim sie niy do wygodzić! Mie samej ôstatnimi czasy chleba na wieczerzo we niydziela brakło, bo popołedniu my grillowali, a chleboszek bōł świyżuśki a gryfnie wypieczōny, to sie go wiyncy zjadło, a jo akuratnie miałach knap kupiōne, bo niyrada stary chlyb wyciepuja.

Jednako zdo mi sie, że je lepi, jak te wielgi markety majōm we niydziela zawarte. Jo miyszkōm kōnsek ôd takigo kaj majōm tyż budowlane rzeczy. Dycki tam tych ludziskōw ze tymi połnymi koszami kupa lotało miyndzy autami. A butlu, co tam dycki bōło! Bo jedyn na drugigo wrzeszczoł, że mu pod nogi lezie,

a ô bele co haja bōła! A teroz we tyn frajny dziyń je tam cicho, a parking je prōzny. Ôjcowie tam szpacyrujōm ze małymi dzieckami, co sie na kołach a hulajnogach uczōm jeździć, bo tam je asfalt rōwny jako stōł!

 

Wiycie, że już hańdowni tyż tak isto bōło! Bo nasze starki dycki przipōminały: Jak kery we niydziela jarmaczy, to ô wszyjstek hnet przidzie, a niy bydzie mioł piniyndzy ani na sōl! To sie niōsło na tych budkorzi – ôdpuściorzi, co we kożdy ôdpust pod kościołym stowali, a ôkropnie drogi towor mieli! Mōj tatulek we 50 – latach musioł, co drugo niydziela robić „tuplōwa” czyli 16 godzin, coby na drugo niydziela mieć pora godzin frajnego czasu! Mōg wtynczos iś ze familijōm do kościoła, a troszka po mieście poszpacyrować. Jednako do dzisio nojwiyncy mi sie widzi godka ôd naszyj sōmsiadki Sowinej, co przikludziyła sie na Ślōnsk ze daleka, ale tyż niydzielnyj roboty niy kwolyła, bo godała tak : Niedzielna praca w gówno się obraca! I miała prawie!

1

Komentarze

  • Chop ze Żorów tyn artykuł 19 września 2018 18:36Jo jeszcze ni mom emerytury, we soboty czasym robia, bo musza, ale we niydziela do roboty bych niy szoł, choćby szczały z nieba prały! Bezto rozumia tych ludzi, co chocioż niydziela chcom mieć frajno! Dobrze ludzie robicie, że walczycie ło to!

Dodaj komentarz