To mi sie wyśniyło

Wtynczos ludzie mieli by dować pozōr na to, co im sie we nocy śniyło, a potym s tego wyciōngnōnć nauki do dalszego żywota. Ale czasym tyn isty niy bōł s tego swojigo śniku mōndry! Bōła u nos jedna starka, co to sie na tych śnikach bezmała znała i ludzie ku nij chodziyli, coby ich ôbjaśniyła. Roz we Silwestra prziszła ku moji starce sōmsiadka Kulino a bōła jakosik podminōwano:
– Elza, wiycie – padała – dzisio
w nocy śniyło mi sie, że prziszła ku mie do łōżka żmijo, ale tako wielgo jak chopsko rynka. Nojprzōd sie ku mie przilizowała, a potym jak jo jōm chciała pohalać, to mie użarła! A mie sie cołki czos zdało, że jo jōm skōndyś znōm, yno niy poradziyłach se spōmnieć skōnd…
– Ej, Kulino, żmijo to ni ma nic dobrego, idźcie wy lepi ku tyj babie, co miyszko u Wartkich. Możnej co mōndrego poradzi, a złe ôd wos ôdgōni! – poradziyła moja starka. No, a baba padała Kulinyj tak:
– Sam niy idzie ô prawo żmijo, sam wōm na zdradzie stoji jakiś czowiek, isto to jakiś chop bydzie! A niy daliście se pozōr jaki miała ta żmijo ôczy? A możnej bōła ze tego pyszczyska do kerego podano?
Wtynczos Kulino spokopiyła, kery to bōł! To bōł jeji przociel, co wiedzioł ô piniōndzach, co ôna miała erbować i chcioł sie ji pozbyć, a samymu ku tym piniōndzōm prziś. I to jeszcze tak, coby żodyn niy doł pozōr , co ôn zamiaruje! Jako widzicie roztōmili, ôstrzeżyni prziszło we nocy przed Nowym Rokym, możnej cosik we tym je!
Drugi taki noworoczny śnik mioł synek ôd naszyj ciotki Gryjty, co mu bōlo dziepiyro ôziym lot. We Nowy Rok rano prziznoł sie mamulce, że mu sie śniło, co na jejim weselu coluśko noc tańcowoł!
– Co tyż tyn bajtel bajuczy! – wkurzała sie na głos ciotka. – Jeszcze se sōmsiady pōmyślōm, że bajtel bōl ze forszusym, abo jo zowitka bōła, jak se mie Stanik broł! – Niy godoł byś takich gupot, przeca jo już downo mōm twojigo tatulka za chopa!
– Naszego tatulka we tym śniku niy bōło! – upiyroł sie bajtel. – yno taki chop podany na naszego fesztra!
Za dwaścia lot ciotka ôwdowiała, a wziyna se starego fesztra, tak, jako sie to prziśniyło jejimu synkowi, co teroz na mamulczynym weselu wywijoł jako we tym noworocznym śniku.

Komentarze

Dodaj komentarz