Idōm feryje!

Jo tym drugim radza tak: weźcie se to roztōmili po lekutku! Wiym to sama po siebie. Jedyn rok zamiarowałach bez feryje pomalować izba. Niby nic wielgigo, pora dni roboty a mōmy pokōj bez pora lot! Wtynczos pogoda bōła niynojlepszo, ale do roboty tak w sōm roz! Piyrszy dziyń ze rana jeszcze przed śniodaniym dostałach telefōn, że przijedzie ku nōm byzuch. Te ludzie yno trzi dni byli, ale bezto sie zaś remōnt ôpōźniył! Potym nastoł taki war, że sie żodnymu nic robić niy chciało. Na kōniec urlop naszym chopōm sie skōńczōł, a bōło po zaplanowanyj robocie! Bezto izba my pomalowali dziepiyro na podzim.
Jednego roku planowali my ze chopym, że se bez te latowe feryje kaj wyjadymy na dwa tydnie. Ôbrali my se gōry i jak już my mieli wszyjstek przirychtowane, to jak na ujma zaczło loć. I cołki dwa tydnie gichało ze nieba jak ze giskany. Dobrze, że my jeszcze zdōnżyli te wywczasy ôdkozać! Potym to już tak dali sie kulało, że porzad cosik bōło do zrobiynio, a niy bōło czasu na rajzy! Jednako dwie drōgi, taki na jedyn dziyń, my zarachowali: do Rudōw Raciborskich, a do Czechōw na gōra Cvilin. Jako je we Rudach to Wōm ôpisować niy musza, bo isto tam kożdy chociaż aby roz bōł. A tym, co jeszcze ani roz tam niy byli, padōm: jedźcie, je tam co poôglōndać a kaj poszpacyrować. Wtynczos jak my do Rudow pojechali, bōł tam tyż jedyn chop ze naszyj, ślōnski telewizyje ze swojōm familijōm. Ludzie go tam zagadowali, ale ôn padoł im, że je sam „incognito”!
Jakbyście sie chcieli podziwać na tyn Cvilin, to jedyn dziyń Wōm styknie! To je we Czechach zaroz za granicōm, wele niygo je miasto Krnōw, a troszka dali – Opawa. Po prowdzie to je dalij Ślōnsk, yno co we Republice Czeski, kero skłodo sie z trzech tajli: Czechôw, Morawōw
a Ślōnska. Wszyndy tam idzie cosik ôbejrzeć. We Opawie je jedna rzecz, co ji tak gibko niy potkocie. Farny, gotycki kościōł mo jedna przipora (to je taki murek przistawiōny do kościōła ze dworu), co ji historyki sztuki godajōm „ucho igielne”, bo je w ni dziura. Bezmała zrobiōł jōm dioboł jak do piekła uciekoł po tym, jak go świyncōnōm wodōm pokropiyli! Piyknej rajzy!

Komentarze

Dodaj komentarz