Kery je lepszy?

Dwa nojlepsze a nojbogatsze we wsi gospodorze to byli Dōmin Wardynga a Eda Wolf. Dōmin to bōł wiyncy Niymiec, a Eda, chocioż mioł niymiecki miano, poważowoł sie za Ślōnzoka.
Te dwa chopy jedyn drugimu ôgrōmno kōnkuryncyjo robiyli!
Roz Dōmin prziszoł ze kościoła a zaroz ze ciepłym polecioł do Edy a padoł mu, że dzisio dowoł fest pozōr na mszy i wyraźnie słyszoł jak farorz śpiywali: Dōmin wo bist du! (po niemiecku: Domin gdzie jesteś!)
– Widzisz jak farorz ô mie pamiyntajōm, a radzi mie we kościele widzōm! A ô ciebie ani słowym niy spōmnōm!
– Przestōń smolić! – ryknōł Eda, a pokozoł sōmsiadowi dźwiyrze.
Jednako we niydziela sie ôkozało, że Domin mioł prawie, a na dodatek farorz pora razy tego gizda wywołali. Eda mało sie niy rozpłakoł, bo jakoż to tak może być? Farorzowo kucharka ôd jego baby masło a śmietōnka biere za „Bóg zapłać” a ô nim we kościele niy bōło ani słowa! Wykōmbinōwoł we kōńcu, że bydzie se musioł te wywołani sōm załatwić! A polecioł pod wieczōr ku kościele, ale jak bōł już tak daleko, to go strach ôblecioł , bo co powiy farorzowi? Bezto zaczōn ôd ôrganisty. Jak mu padoł co a jak sie mō i że ôn (Eda) niy chce tego za darmo, ôrganistowi ôczka sie zaświyciyły ze pragliwości, bo wiedzioł, że Eda we swojim parzoku rychtuje ôgrōmnie dobro a ôstro gorzoła i nawet sōm panoczek japtykorz ze Raciborza jōm po cichu kupuje do tych lykōw, co robi. Ugodali sie, że Eda prziniesie ôrganistowi piykny balōn tyj swoji mikstrury „na kaszel” a ôn za to jego prośba załatwi.
We nojbliższo niydziela Eda siod we swoji ławce a czakoł, co bydzie dali. Hnet ze poczōntku farorz wyjechali z tym swojim „Dominus wobiscum” a na to ôrganista ôdśpiywoł:
– Edkōw spirytus tuło! I tego Edowi bōło już za tela!
– Ty pierōński ôżyroku, mōj szpirytrus niy tuło – ryknōł – yno ōbalo! Potym trzasnōł dźwiyrzami a znerwowany wyskoczył ze kościoła. Jeszcze ku chałpie niy zalecioł a już szandara bōł za nim, a go wołoł:
– Jo teroz noreście wiym, kery sam bimber warzi, ale nic niy powiym, jak balōn dostana!
Tak to bez pycha a gupota Eda narobioł afery! Jednako była tyż ze tego jedna korziść: Chop kōntmanōw na ta swoja gorzoła nazbiyroł, a ze Dōminym sie pogodziył, bo ôn tyż za kark niy wylywoł, a gorzelnia mioł teroz po blisku!

Komentarze

Dodaj komentarz